Алтны үнэ сүүлийн 14 жилд байгаагүйгээр өсөж, 2025 онд ч өсөлтөө хадгална гэж Уолл Стрийтийн шинжээчид таамаглаж байна.

Үнийн өсөлт:

Пүрэв гарагт алтны фьючерс (GC=F) 1%-иас дээш өсөж, унц нь $2,670 гаруй хүрч, арванхоёрдугаар сарын дунд үеэс хойших хамгийн өндөр түвшинд хүрчээ. Хөрөнгө оруулагчид Холбооны Нөөцийн Систем (ФРС) хүүгийн түвшинг дахин бууруулж магадгүй гэсэн хүлээлт, мөн гадаадын төв банкуудын алт худалдан авалтыг харгалзан шинэ оноо угтсан байна.

Хэдийгээр 2024 оны арваннэгдүгээр сард Дональд Трамп Ерөнхийлөгчийн сонгуульд ялснаас хойш алтны өсөлт зогсонги байдалд орсон ч тус металлын жилийн өсөлт 27%-иар хэмжигдэж, S&P 500-ийн 23%-ийн өсөлтөөс давсан байна.

2025 оны таамаглал:

JPMorgan-ийн шинжээчид “2025 оны эхэн үеэс Трампын засаг захиргаа эхлэхтэй холбоотой макро орчны тодорхойгүй байдлыг хеджлэхэд алт тохиромжтой хэвээр байна” хэмээн дүгнэж, алтны талаар гурав дахь жилдээ өөдрөг урт хугацааны хандлагыг хэвээр хадгалж буйгаа илэрхийлжээ. Тус банк алтны үнийг 2025 онд $3,000 хүрнэ гэж үзэж байна.

Goldman Sachs-ийн шинжээчид ч мөн адил 2025 оны сүүл гэхэд алт $3,000 хүрнэ гэж таамаглаж байгаа бөгөөд дэлхийн төв банкуудын алт худалдан авалт үүнд гол нөлөө үзүүлнэ гэж үзжээ.

Гол хүчин зүйлс:

• Геополитикийн эрсдэл ба төв банкуудын худалдан авалт: Goldman Sachs-ийн шинжээчид “Хөгжиж буй зах зээлүүдийн төв банкууд алт худалдан авч, санхүүгийн болон геополитикийн шокыг хеджлэх хандлагатай байдаг” гэж дурджээ.
• Үнийн боломжит өөрчлөлт: Алтны үнэ төв банкууд хүлээгдэж байснаас илүү их алт худалдан авбал $3,050 хүрч болзошгүй, харин ФРС зөвхөн нэг удаа хүү бууруулбал $2,900 орчимд зогсонги байдалд орно гэж таамаглаж байна.

Зах зээлийн хандлага:

Хэрэв ФРС хүүг дахин хоёр удаа бууруулбал жижиглэнгийн хөрөнгө оруулагчид алтанд хөрөнгө оруулах магадлалтай гэж үзэж байна. Steven Feldman, GBI платформын үүсгэн байгуулагч, гүйцэтгэх захирал “2024 онд жижиглэнгийн хөрөнгө оруулагчид алтанд төдийлөн оролцоогүй. Харин хүү буурч, инфляц эсвэл зогсонги байдал үүсвэл АНУ-ын жижиглэнгийн хөрөнгө оруулагчдын урсгал алтны үнийн өсөлтийг дэмжих болно” гэж Yahoo Finance-д өгсөн ярилцлагадаа онцолжээ.