Wells Fargo-ийн үзэж байгаагаар хувьцааны зах зээлд үүссэн эйфорик өсөлт богино хугацааны "дээрээс уналт" дагуулж магадгүй.

Сонгуулийн дараах хувьцааны өсөлт эдийн засгийн мэдээлэлтэй уялдахгүй байгаа нь үүний дохио гэж тус банк тайлбарласан байна.

Тус зөрүү арилгах шаардлагатай бөгөөд энэ нь зах зээлд засвар (унац) авчрах боломжтой гэж тус банк анхааруулжээ.

2024 он хувьцааны зах зээлийн хувьд гайхалтай жил байсан. Гэхдээ сонгуулийн дараах хэт өөдрөг үзэлтэй өсөлт нь богино хугацаанд S&P 500 индекс 7%-иар унах эрсдэл дагуулж байна гэж Wells Fargo мэдэгдлээ.

Эдийн засгийн өгөгдөл ба зах зээлийн зөрүү

Даваа гаригт гаргасан тэмдэглэлдээ Wells Fargo хувьцааны зах зээл болон эдийн засгийн өгөгдлийн хоорондын зөрүү нэмэгдэж байгааг онцолсон. Ерөнхийлөгчийн сонгуулийн дараа АНУ-ын индексүүд өссөн ч эдийн засгийн өгөгдлүүд хангалттай өөдрөг бус байгаа нь анхаарал татаж байна.

Bloomberg-ийн АНУ-ын Эдийн засгийн Гайхшралын Индекс (Economic Surprise Index) зах зээлийн хүлээлттэй харьцуулахад эдийн засгийн мэдээллүүдийг үнэлдэг бөгөөд энэ индекс одоогоор тэгийн түвшинд ойрхон байна. Энэ нь зах зээлд эдийн засгийн гэнэтийн сайн мэдээ цөөн байгаа ч хувьцааны зах зээл эерэг сэтгэл хөдлөлөөр өсөж буйг харуулж байна.

Wells Fargo-ийн шинжээч Самеер Самана:

"Энэ нь санаа зовох асуудал. Сонгуулийн дараа зах зээлд үүссэн эерэг хандлагын төвшинг харгалзан үзвэл хөрөнгө оруулагчид ирээдүйн гэрэл гэгээтэй дүр зургуудыг онцолж, одоогийн тааруухан өгөгдлүүдийг бүрэн үл тоож байна," гэжээ. Тэрээр цааш нь, "Эцэст нь энэ зөрүү засагдах шаардлагатай гэж бид үзэж байна."

Техникийн шинж тэмдгүүд ба болзошгүй уналт

Хувьцааны зах зээл техникийн хувьд "хэт худалдан авалттай" бүсэд ойрхон байгааг шинжээч Самана анхааруулжээ. S&P 500 индекс энэ долоо хоногт 5,964-т хүрсэн нь 50 болон 200 өдрийн хөдөлгөөнт дундажаас өндөр үзүүлэлт байв.

Самана цааш нь:

Богино хугацаанд индекс хамгийн сүүлд 6,090-д хүрч дээд хязгаар тогтоож магадгүй гэж тооцоолсон.

Хэрэв индекс доошлох хандлагатай бол 5,515 орчимд дэмжлэг авах боломжтой бөгөөд энэ нь 7%-ийн уналт гэсэн үг юм.

2025 оны өөдрөг төсөөлөл

Wells Fargo 2025 онд хувьцааны зах зээлд өөдрөг хандлагатай хэвээр байна. Өмнөх тэмдэглэлдээ тус банк S&P 500 индексийг 2025 оны төгсгөлд 6,500-6,700 хооронд хүрнэ гэж таамаглажээ. Үүнд эдийн засгийн таатай орчин, аж ахуйн нэгжийн ашиг өснө гэсэн хүлээлт нөлөөлнө гэж үзжээ.

Бусад шинжээчдийн санал

BCA Research: S&P 500-ийн одоогийн өндөр ханш, АНУ-ын эдийн засгийн сул дорой байдлаас үүдэн ирэх оны эхээр зах зээл баавгайн бүс рүү орж болзошгүй гэж анхааруулсан.

Société Générale: Хөдөлмөрийн зах зээлд илэрч буй сулрал болон ашиг багасах магадлалтай байгааг онцолж, АНУ эдийн засгийн хямралд орох эрсдэл хэвээр байна гэж дүгнэжээ.