SpaceX компани хувьцаагаа хаалттай хүрээнд зарах хэлэлцээр хийж байгаа бөгөөд энэ нь Элон Маскийн пуужин, хиймэл дагуулын компанийн үнэлгээг ойролцоогоор 350 тэрбум ам.долларт хүргэж магадгүй байна гэж энэхүү асуудалд ойр эх сурвалжууд мэдээлэв.

Энэ нь Bloomberg News болон бусад хэвлэл мэдээллийн байгууллагуудаас өнгөрсөн сард мэдээлж байсан 255 тэрбум ам.долларын үнэлгээнээс нэлээд өндөр үнэ цэнтэй болж байна. Мөн энэ нь SpaceX-ийг дэлхийн хамгийн өндөр үнэлгээтэй хувийн стартап компани болохыг улам баталгаажуулна. SpaceX-ийг энэ оны эхээр хийсэн тендерийн саналд ойролцоогоор 210 тэрбум ам.доллараар үнэлж байсан.

SpaceX (Space Exploration Technologies Corp.) нь одоогоор тайлбар өгөх хүсэлтийг хүлээж аваагүй байна.

Энэхүү хэлэлцээрүүд үргэлжилж байгаа бөгөөд боломжит наймааны дэлгэрэнгүй мэдээлэл нь дотоод хувьцаа эзэмшигчид болон худалдан авагчдын сонирхлоос хамааран өөрчлөгдөж магадгүй гэж нэрээ нууцлахыг хүссэн эх сурвалжууд мэдэгдсэн бөгөөд тэднийг олон нийтэд мэдээлэл өгөх эрхгүй юм.

Ажилчид болон анхны хөрөнгө оруулагчид хувьцаагаа зарах боломжтой тендер буюу хоёрдогч санал нь, Маск болон шинээр сонгогдсон АНУ-ын Ерөнхийлөгч Дональд Трамп нарын хоорондох харилцаа гүнзгийрч байгаа энэ үед SpaceX-ийн хөрөнгө оруулагчдад хөрвөх чадвараа нэмэгдүүлэх боломжийг олгож байна.

Үнэлгээний боломжит өсөлт нь АНУ-ын Ерөнхийлөгчийн сонгуулийн дараа Маскийн эзэнт гүрэн асар их ашиг олсныг харуулж байна. Tesla компанийн хувьцаа 11-р сарын 5-наас хойш 42%-иар өссөн бол Маскийн өөрийн хөрөнгө Bloomberg-ийн тэрбумтнуудын индексийн дагуу 353 тэрбум ам.долларт хүрчээ.

Ойролцоогоор 350 тэрбум ам.долларын үнэлгээтэй SpaceX нь зах зээлийн үнэлгээний хувьд дэлхийн хамгийн том олон нийтийн арилжаат компаниудтай эн зэрэгцэх хэмжээнд хүрэх юм.