Хиймэл оюун ухаанд хөрөнгө оруулалт хийх нь зөв үү?
Симбол: NVDA
Хандлага гэдэг зүйл бол түр зуурынх байдаг бөгөөд хөрөнгө оруулалт, зах зээлийн ертөнц ч үүнээс үл хамаарахгүй.
2020 онд гэрээсээ ажиллах тренд хүчээ авсан. 2021 онд эдийн засгийн дахин нээлт яригдаж байлаа. 2022 онд крипто болон дижитал хөрөнгө, мөн бага зэрэг ESG (Байгаль орчин, Нийгэм, Засаглал)-ийг онцолсон. Харин 2023 он "Сэтгэл татам долоон хувьцаа"-ны жил байв. Энэ жил юу вэ? Мэдээж, хиймэл оюун ухаан. Харин дэлхийд тэргүүлэгч Nvidia (NVDA) энэ салбарын гол тоглогч болоод байна.
Nvidia-гийн улирлын тайлан гарсны өмнө болон дараа үзүүлэх анхаарал, сурвалжлагуудыг харахад тус компани 2024 оны хувьцаа гэдэг нь тодорхой байна. Энэ нь тус компанийг үнэлгээний хувьд маш өндөр түвшинд хүргэж, шинжээчид болон хөрөнгө оруулагчид тус компанийн борлуулалт, ирээдүйн орлого болон AI-д зориулсан чипүүдийн эрэлт дээр итгэмээргүй өндөр хүлээлт тавьж байна.
Сүүлийн улирлын тайлан үүнийг баталсан. Лхагва гарагт гарсан тайлангийн өмнө болон дараа хэвлэл мэдээллийн хэрэгслээр "Супербоул"-ийн хэмжээний анхаарал татаж байсан нь үүнийг илтгэнэ.
Үүний гол шалтгаан тодорхой: Nvidia бол AI-ийн хаан бөгөөд Microsoft (MSFT), Google (GOOG), Amazon (AMZN) зэрэг томоохон үйлчлүүлэгчид түүний хагас дамжуулагч болон техник хангамжийг их хэмжээгээр худалдан авч, AI-д суурилсан үйлчилгээгээ сайжруулж байна. Гэхдээ хөрөнгө оруулалтын хувьд бүх зүйл хэтийн төлөвтэй холбоотой. Nvidia зах зээлийн хүлээлтээс давсан улирлын тайлан гаргасан ч хувьцааны ханш түр зуур буурсан. Зарим хөрөнгө оруулагчид ашиг хүртэх зорилгоор хувьцаагаа зарж байгаа бол зарим нь борлуулалт 94%-иар өссөн ч өмнөх өсөлтийн түвшинтэй харьцуулахад хангалтгүй гэж үзсэн байж болно.
Nvidia өмнөх улирлуудад 122%, эхний улиралд 262%, 2023 оны сүүлийн улиралд 265%-ийн өсөлттэй байсан.
AI-г дэмжигчид хиймэл оюун ухааны дараагийн түвшний тооцооллын эхэн үед байгаа гэж үзэж байна. Харин Nvidia-г дэмжигчид тус компани өрсөлдөгчдөөсөө хэдэн алхмын урд явж, шаардлагатай чип, техник хангамжаар хангаж байна гэж итгэдэг.
“Бид тооцооллын салбарт хувьсгал авчрах маш эртний үе шатанд байгаа” гэж Creative Strategies-ийн хэрэглэгчийн технологийн практикийн захирал Бен Бажарин тайлан гарсны дараа Yahoo Finance-д өгсөн ярилцлагадаа хэлжээ.
Гэхдээ зарим шинжээчид Nvidia-гийн үйлчлүүлэгчид болох Meta (META), Microsoft болон Google зэрэг компаниуд AI-д зориулж зарцуулсан тэрбум тэрбум ам.долларынхаа орлогыг эргүүлэн олж чадах эсэхэд эргэлзэж байна. Тус компанийн өндөр эрэлттэй Blackwell чипийн үйлдвэрлэлийн хүчин чадал нь мөн анхаарал татаж байна.
"Blackwell чипийн үйлдвэрлэл болон хэрэглэгчийн төвлөрөлтэй холбоотой чухал асуудлууд хэвээр байна. 2025 онд ямар ч алдаа гаргах зай байхгүй" гэж Emarketer-ийн Жейкоб Бурн тэмдэглэжээ.
Мөн улс төрийн тодорхой бус байдал бий. Тухайлбал, Дональд Трамп дэлхий даяарх бүтээгдэхүүн, тэр дундаа Тайваньд үйлдвэрлэгддэг чип болон эд ангиуд дээр тариф ногдуулах талаар мэдэгдсэн. Nvidia болон бусад компанийн чипийг үйлдвэрлэдэг TSMC зэрэг компаниуд АНУ-д үйлдвэр барихыг урамшуулах талаар ч хэлсэн байна.
Хөрөнгө оруулагчид болон шинжээчид ихэвчлэн Nvidia-д 2025 он хүртэл хөрөнгө оруулсаар байх төлөвтэй байна. Одоогоор тус компанийн хувьцаа 210%-иар өсөөд байна.
Гэхдээ дараагийн улирлын хүлээлт аль хэдийн өндөр байгаа: 2025 оны нэгдүгээр сард дуусах улирлын орлого 38 тэрбум ам.долларт хүрнэ гэж Yahoo Finance-ийн 40 шинжээчийн дундаж тооцоогоор үзэж байна. Энэ нь хамгийн сүүлийн улирлын 35.1 тэрбум ам.доллароос өссөн үзүүлэлт юм.
Хэрэв эрэлт хэзээ ч дуусашгүй биш гэдэг нь тодорхой. Нэг өдөр AI хөгжүүлэлт AI ашиглалтаас түрүүлж эхлэх магадлалтай. Энэ үед хөрөнгө оруулагчид Nvidia-гийн борлуулалт, орлогын талаарх хүлээлтээ аль хэдийнэ өөрчлөх болно. Тиймээс AI нь тооцооллын ертөнцийг удаан хугацаанд өөрчлөх үү эсвэл ээлжит хөрөнгө оруулалтын хандлага төдийхөн байх уу гэдэг асуулт л үлдэж байна.