Intel (INTC) компанийн тайлан
Симбол: INTC
Хагас дамжуулагчийн томоохон үйлдвэрлэгч Intel (INTC) компани дөрөвдүгээр улирлын таамаглалын үзүүлэлтээ илүү сайн гаргасны дараа пүрэв гарагийн оройн арилжаагаар хувьцааны ханш нь бараг 7%-иар өссөн байна.
Intel-ийн гүйцэтгэх захирал Пат Гелсингер Yahoo Finance-д өгсөн ярилцлагадаа “Энэ улирал бидний хувьд чухал байсан бөгөөд ирээдүйд итгэл төрүүлэхүйц байна” гэж хэлжээ. Гэсэн хэдий ч тайлангийн дэлгэрэнгүй дүн шинжилгээ хийвэл хувьцааны өсөлт бага зэрэг хэтрүүлэгдсэн байж магадгүй юм.
Intel нь зарим салбар, тухайлбал түүний эзэмшлийн Mobileye гэх автономит жолоодлогын технологийн компанид хийгдсэн хөрөнгө оруулалтаас 15.9 тэрбум ам.долларын алдагдлыг тайлагнажээ. Intel Foundry буюу түүний чип үйлдвэрлэлийн шинэ бизнес нь 4.4 тэрбум ам.долларын борлуулалтаас 5.8 тэрбум ам.долларын алдагдал хүлээсэн байна.
Компани 2025 он хүртэл үйлдвэрлэлийн салбартаа болгоомжтой хандаж буйгаа мэдэгдэж, зардлаа бууруулах 10 тэрбум ам.долларын төлөвлөгөөг хэрэгжүүлж, санхүүжилтийн бусад эх үүсвэрийг хайх болно гэдгийг мэдэгджээ.
Intel нь АНУ-ын CHIPS хууль-аас шаардлагатай санхүүжилтийг хараахан аваагүй байгаа ч АНУ-ын Охайо болон Аризона мужид чип үйлдвэрлэлийн үйлдвэрээ нээх ажлаа үргэлжлүүлнэ гэж Гелсингер хэлэв. Байдены засаг захиргаа Intel-ийн төслүүдэд зориулж 8.5 тэрбум ам.долларын санхүүжилт баталсан боловч тус компани төлөвлөсөн ажлуудыг хэрэгжүүлэхийн тулд засгийн газрын тусламжийг хүлээж байна.
Гелсингер хэлэхдээ “CHIPS хууль нь бидний хувьд маш чухал бөгөөд бид ихээхэн цаг хугацаа, хүч чармайлт зарцуулсан ч санхүүжилтийг хүлээх хугацаа уртсаж байгаад сэтгэл дундуур байна. Энэ хугацаанд АНУ дахь үйлдвэрлэлд 30 тэрбум ам.долларын хөрөнгө оруулалт хийсэн боловч CHIPS хуулиас ямар ч санхүүжилт аваагүй байна” гэжээ.
Intel компани Nvidia, AMD, TSMC зэрэг өрсөлдөгчидтэй өрсөлдөхөд бэрхшээлтэй тулгарч байна гэж Уолл Стрит үзэж байна. Goldman Sachs-ийн шинжээч Тошия Хари, Intel-ийн технологи, ялангуяа хиймэл оюун ухааны чипийг өрсөлдөгчидтэй ижил түвшинд аваачихад хугацаа шаардагдана гэжээ.
Үүний зэрэгцээ, Гелсингер TSMC-тэй харилцаагаа тайлбарлахдаа тэд Intel-ийн Lunar Lake гэх хиймэл оюун ухааны шинэ төхөөрөмжид чухал хувь нэмэр оруулсан гэж хэлсэн бөгөөд энэ нь Intel-ийн төсөлд амжилттай нөлөөлсөн байна. TSMC бол Intel-ийн хамтрагч төдийгүй өрсөлдөгч гэж тэрээр нэмж хэлжээ.
Intel-ийн тайлангийн тойм
Цэвэр борлуулалт: 13.3 тэрбум ам.доллар (өмнөх оны мөн үеэс 6%-иар буурсан), таамаглал 13.02 тэрбум ам.доллар байв.
Үйлчлүүлэгчдийн компьютерийн борлуулалт: 7.3 тэрбум ам.доллар, таамагласан 7.46 тэрбум ам.доллараас бага.
Мэдээллийн төв ба AI борлуулалт: 3.3 тэрбум ам.доллар, таамаг 3.15 тэрбум ам.доллар байв.
Mobileye борлуулалт: 485 сая ам.доллар, таамаг 485.5 сая ам.доллар байв.
Intel Foundry борлуулалт: 4.4 тэрбум ам.доллар, таамаг 4.44 тэрбум ам.доллар байв.
Тохируулсан ашгийн хэмжээ: 18%, таамаг 38% байв.
Тохируулсан нэгж хувьцааны ашиг (EPS): -0.46 ам.доллар (+0.41 ам.доллар өмнөх онд), таамаг -0.03 ам.доллар.
Дөрөвдүгээр улирлын таамаг
Цэвэр борлуулалт: 13.3-14.3 тэрбум ам.доллар, таамаг 13.63 тэрбум ам.доллар.
Тохируулсан нэгж хувьцааны ашиг (EPS): 0.12 ам.доллар, таамаг 0.06 ам.доллар.