Лхагва гарагт нийтлэгдсэн Tesla (TSLA)-ийн сүүлийн үеийн тайлангаар тус компани 3-р улиралд 462,890 ширхэг автомашин нийлүүлсэн байна. Энэ нь шинжээчдийн дундаж таамаглал болох 463,310-аас бага үзүүлэлт юм.

Гол шалтгаан нь юу вэ?

Хүлээлтийг хангаж чадаагүй: Теслагийн шүтэн бишрэгчид ч тэр, бусад шинжээчид ч тэр, компани илүү олон машин нийлүүлнэ гэж найдаж байсан. Тухайлбал, зарим шинжээчид 469,828 ширхэг машин нийлүүлнэ гэж таамаглаж байсан бол, Теслагийн шүтэн бишрэгчдийн нэг нь 472,000 ширхэг машин нийлүүлнэ гэж урьдчилан хэлсэн байв.

Теслагийн 3-р улирлын үр дүн хүлээлтээс бага зэрэг доогуур гарсан нь хөрөнгө оруулагчдын сэтгэлийг зовоож, хувьцааны үнэ 3.7%-иар буурахад хүргэсэн байна. Гэсэн хэдий ч компани үйлдвэрлэлээ нэмэгдүүлэхээр үргэлжлүүлэн ажиллаж байгаа тул ирээдүйд илүү сайн үр дүн үзүүлэх боломжтой юм.

Өмнө жилийн мөн үед Tesla 435,059 хүргэлт хийж, 430,488 цахилгаан автомашин үйлдвэрлэжээ. Өнгөрсөн улиралд тус компани 443,956 тээвэрлэлт хийж, 410,831 автомашин үйлдвэрлэсэн байна. Компанийн хувьд хямд үнэтэй Хятадын BYD, Geely зэрэг компаниуд болон Ли Авто, Нио зэрэг шинэ үеийн автомашин үйлдвэрлэгчдээс ирэх өрсөлдөөн нэмэгдсээр байгаа.

АНУ-д Ривиан зэрэг цахилгаан машины үйлдвэрлэгчид зах зээлээ олж байгаа бол хуучин автомашин үйлдвэрлэгч Ford (F), General Motors (GM) нарын цахилгаан автомашины борлуулалтын тоо өсжээ. Лхагва гарагт Ford (F) гуравдугаар улиралд 23,509 цахилгаан автомашин борлуулсан гэж мэдээлэлсэн нь өмнөх оныхоос 12 хувиар өссөн байна.

GM 3-р улиралд цахилгаан автомашины борлуулалт өмнөх оныхоос ойролцоогоор 60%-иар өссөн гэж мэдээлэв. Гэсэн хэдий ч түүний цахилгаан автомашины бизнес нь Теслагийнхтай харьцуулахад жижигхэн бөгөөд 32,100 ширхэг зарагдсан нь компанийн нийт борлуулалтын 4.9 хувийг эзэлж байна.

Tesla АНУ-д бусад автомашин үйлдвэрлэгчээс илүү олон батерейгаар ажилладаг цахилгаан тээврийн хэрэгсэл борлуулсан хэвээр байгаа бөгөөд Hyundai хоёр дугаар байранд жагсаж байна. Компани нь энэ сарын сүүлээр 3 дугаар улирлын орлого, үр дүнгийн тайлангаа тавих бөгөөд хөрөнгө оруулагчид үүнийг анхааралтай ажиглах байх.

Tesla сүүлийн саруудад Хятад болон АНУ-д борлуулалтын хэмжээг нэмэгдүүлэхийн тулд сонирхолтой санхүүжилтийн сонголтууд болон олон төрлийн урамшууллыг санал болгосоор байна. Орлого үр дүнгийн тайлангаа тавихаас өмнө Tesla 10-р сарын 10-нд маркетингийн арга хэмжээ зохион байгуулах бөгөөд энэ үеэрээ шинэ бүтээгдэхүүн болох "робот таксины" загвараа танилцуулах хүлээлттэй байна.

Маск олон жилийн турш Tesla-д автомат жолоодлоготой машинуудыг амласан ч одоогоор энэ зорилго хараахан биелэгдээгүй байна. Үүний зэрэгцээ Waymo болон Pony.ai зэрэг өрсөлдөгчид арилжааны роботакси үйлчилгээг ажиллуулж эхэлжээ.